2Sa 16 | NdeIBE | STEP | Kwathi uDavida esehambe ibanga elifitshane ngale kwenqongo, wabona uZiba, isikhonzi sikaMefibhoshethi, elindele ukumhlangabeza, elodwendwe lwabobabhemi ababotshelwe izihlalo bethwele izinkwa ezingamakhulu amabili, ikhulu lamakhekhe ezithelo ezonyisiweyo, ikhulu lamakhekhe omkhiwa kanye lomgodla wewayini.

2 Samuel 16

UDavida loZiba

1 Kwathi uDavida esehambe ibanga elifitshane ngale kwenqongo, wabona uZiba, isikhonzi sikaMefibhoshethi, elindele ukumhlangabeza, elodwendwe lwabobabhemi ababotshelwe izihlalo bethwele izinkwa ezingamakhulu amabili, ikhulu lamakhekhe ezithelo ezonyisiweyo, ikhulu lamakhekhe omkhiwa kanye lomgodla wewayini.

2 Inkosi yabuza uZiba yathi, “Ukuletheleni lokhu na?” UZiba waphendula wathi, “Obabhemi ngabomdlunkulu wenkosi ukuba bagade, izinkwa lezithelo ngokwabantu ukuba badle, iwayini ngelokuqaqabula labo abaphela amandla enkangala.”

3 Inkosi yasibuza yathi, “Indodana yendodana yenkosi yakho ingaphi na?” UZiba wathi kuyo, “Ihlezi eJerusalema, ngoba icabanga ithi, ‘Lamhla indlu ka-Israyeli izangibuyisela umbuso kababamkhulu.’ ”

4 Inkosi yasisithi kuZiba, “Konke okwakungokukaMefibhoshethi khathesi sekungokwakho.” UZiba wathi, “Ngikhothama ngokuzithoba. Sengathi ngingathola umusa emehlweni akho mhlekazi wami, nkosi.”

UShimeyi uthuka uDavida

5 Kwathi uDavida esifika eBhahurimi, umuntu wosendo lunye labendlu kaSawuli, waphuma evela lapho. Ibizo lakhe lalinguShimeyi indodana kaGera, njalo waphuma esethuka.

6 Wajikijela uDavida lezikhulu zonke zenkosi ngamatshe, lanxa amabutho wonke labalindi abakhethiweyo babengakwesokudla lakwesenxele kukaDavida. 7 Ekuthukeni kwakhe uShimeyi wathi, “Phuma, phuma, wena wegazi, wena sixhwali! 8 UJehova usephindisele kuwe ngenxa yegazi lonke owalichithayo kwabendlu kaSawuli, wena osubusa esikhundleni sakhe. UJehova umbuso usewunike indodana yakho u-Abhsalomi. Wena usudilikile ngoba ungumuntu wegazi!”

9 Lapho-ke u-Abhishayi indodana kaZeruyiya wathi enkosini, “Kungani inja efileyo le ithuka inkosi yami? Ngivumelani ngiyequma ikhanda layo.”

10 Kodwa inkosi yathi, “Kuyini okulihlanganisa lami, lina madodana kaZeruyiya? Uma ethuka ngenxa yokuthi uJehova uthe kuye, ‘Mthuke uDavida,’ ngubani ongabuza ukuthi, “Lokhu ukwenzelani na?’ ”

11 UDavida wasesithi ku-Abhishayi lakuzo zonke izikhulu zakhe, “Indodana yami, eyinyama yami, izama ukungibulala. Pho umBhenjamini lo ke! Myekeleni enjalo; yekelani athuke, ngoba uJehova umtshele ukuba enze njalo. 12 Engxenye uJehova uzalubona usizi lwami angibuyisele okuhle ngenxa yokuthukwa engikwenziwayo lamhla.”

13 Ngakho uDavida labantu bonke waqhubeka elandela umgwaqo uShimeyi yena ehamba eyame intaba maqondana laye, ehamba elokhu ethuka njalo emjikela ngamatshe emthela langengcekeza. 14 Inkosi labantu bayo bafika lapho ababesiya khona sebediniwe. Kulapho abaphumula khona.

Iseluleko sikaHushayi lo-Ahithofeli

15 Ngalesosikhathi, u-Abhsalomi labantu bonke bako-Israyeli bafika eJerusalema, lo-Ahithofeli wayelaye. 16 Lapho-ke uHushayi um-Ariki, umngane kaDavida, waya ku-Abhsalomi wathi kuye, “Impilo ende nkosi! Impilo ende nkosi!”

17 U-Abhsalomi wabuza uHushayi wathi, “Lolu yilo uthando olutshengisa umngane wakho na? Kungani ungahambanga lomngane wakho na?”

18 UHushayi wathi ku-Abhsalomi, “Hayi, lowo okhethwe nguJehova, langabantu laba, labantu bonke bako-Israyeli ngizakuba ngowakhe, njalo ngizahlala laye.

19 Phezu kwalokho, ngubani engingamkhonza na? Akumelanga ngikhonze indodana na? Njengoba ngakhonza uyihlo, kanjalo ngizakukhonza.”

20 U-Abhsalomi wasesithi ku-Ahithofeli, “Ake useluleke. Kuyini esingakwenza na?”

21 U-Ahithofeli waphendula wathi, “Lala labafazi bakayihlo abaseceleni abatshiya belinde isigodlo. Lapho-ke u-Israyeli wonke uzakuzwa ukuthi wena usuzenze waba liphunga elibi emakhaleni kayihlo, njalo izandla zabantu bonke abalawe zizaqiniswa.” 22 Ngakho u-Abhsalomi bammisela ithente phezu kophahla lwendlu, walala labafazi bakayise beceleni u-Israyeli wonke ekhangele.

23 Ngalezonsuku iseluleko sika-Ahithofeli, sasifana lesalowo obuze uNkulunkulu. Lokho kwaba yiyo indlela uDavida lo-Abhsalomi abakhangela ngayo zonke izeluleko zika-Ahithofeli.